I TRAM E LA PENSILINA


Poch piü, poch men da cent ann fa
incumincian i nuvità
a l’alba dal növcent
s’invian i muviment
in tütt Europa
sa discütt, sa parlota,
nass di grand prugétt pilóta!

… ‘l’è tütt un cantiér
al par stai iér,
i feruvii transalpin
a i culega anca ul bèll Tésín,
ul dialètt
al comincia fa difètt.
Altri cultüur, nazion, cambia i parlàat
indì nóss cuntráad…

Lì par i strad sa posa binari, ecu i tram
è coinvolt anca la cità da Lügan!

Ul “paésagg” adèss
cun stu prugrèss
‘l’è culegáa, giò indal pian, fin sü in Bess.
Sa riva lì anca in stazion
par na a tö i furestée cui so valisòn!!!

… mò è scumparíit caritt e cavai
par lassáach ul post a i tramvai…

…da tücc i tram ul püsée “atletich”
‘l’èva quell da Bess, cul só frenu magnetich!!!...

L’omm là davanti, ul macchinista,
dal biglietari, sempru in vista,
indi fermáat, questa ‘l’eva bela
al tirava na curdela
e in “sala comando” sonava la campanéla.

Passa i ann, mia senza incunveniént
è mia mancaa un quei incidént
ma in mèzz a tütt, stu “bèll” temp ‘l’è nai
e mò a i dà fastidi ‘sti tramvai;
lì fermi in sü i rotai
süi scambi lì in strada
a specià l’altra “vagonada”!

… l’èra di tram la tramunta,
e ‘dasi ‘dasi, via sa smunta….

Par guadagnà temp süi percùrs
sa tacum ai filibús
vegn slargáa strad, sa crea piazz da gìr
ul tütt par sti bús e i so fir,
ma anca stu “mezzo” al fa storia ‘l’è cundiziunáa,
cul trafich che aumenta al vegn surpasáa.

… sa dév decid; tra discüssion e “maldicenz”
vita, spunta fö i Mercedes Benz…

Bèi, spaziuss sti turpedon;
sa dev stüdià, percurs. na növa stazion,
a cuncurs la prugetazion
e via, cun l’architétt Botta, di lavur la direzion!

… ma a opera finida sta pensilina
‘l’è funzionáal e anca “CARINA”!

Ma dopu sti avèniment, anca sì cun un puu da confüsion
sem cuntént, và; che Lügan ‘l’è culegáa cun tütt i rion!

Mò la sigla ‘l’è TI.PI.ELL.,
al sóna ben indi urecc, al po’ vess bèll
ma par i nustalgich, in là cui ann
mei quand ‘l’èva la “tramvia” che traversava Lügan!